വളയം: (nadapuram.truevisionnews.com) സംസ്ഥാന കായികമേളയിൽ തിളക്കമാർന്ന വിജയം നേടിയ വളയം യു.പി. സ്കൂളിലെ യുവപ്രതിഭകളായ സിയാ സുനിൽ, സാൻരാഗ് യു.കെ. എന്നിവർക്ക് സ്കൂളും നാടും ചേർന്ന് ഉജ്ജ്വല സ്വീകരണം നൽകി. സംസ്ഥാന കായികമേളയിൽ 100 മീറ്റർ ഓട്ടത്തിൽ വെള്ളി മെഡൽ ജേതാവാണ് സിയാ സുനിൽ. 100 മീറ്ററിൽ സംസ്ഥാനതലത്തിൽ പങ്കെടുത്ത താരമാണ് സാൻരാഗ് യു.കെ.
ഈ വിജയത്തിലേക്ക് സിയാ സുനിലിന് കൈത്താങ്ങായി നിലവിൽ വളയം ഗവൺമെൻ്റ് ഹയർസെക്കൻഡറി സ്കൂളിൽ എട്ടാം ക്ലാസ് വിദ്യാർത്ഥിനിയും സ്കൂൾ പൂർവ്വ വിദ്യാർത്ഥിനിയുമായ സാൻഡ്രിയയാണ് ഓടിയത്. വിജയത്തിന് വഴികാട്ടിയ സാൻഡ്രിയയെയും ചടങ്ങിൽ പ്രത്യേകം അഭിനന്ദിച്ചു.
വിദ്യാർത്ഥികളും അധ്യാപകരും പി.ടി.എ. പ്രതിനിധികളും അണിനിരന്ന വർണ്ണശബളമായ ഘോഷയാത്രയോടുകൂടിയാണ് വിജയികളെ സ്കൂളിലേക്ക് വരവേറ്റത്. വളയം യു.പി. സ്കൂളിൽ വെച്ച് 2025 ഒക്ടോബർ 27 തിങ്കളാഴ്ച രാവിലെ 11 മണിക്ക് നടന്ന 'ആദരം' അനുമോദന ചടങ്ങ് ഹൃദ്യമായി.
സിയക്ക് വെള്ളി കൊലുസ് അനുമോദന ചടങ്ങിൽ വിജയികൾക്ക് മൊമന്റോകൾ സമ്മാനിച്ചു. വെള്ളി മെഡൽ ജേതാവായ സിയാ സുനിലിന് മൊമന്റോയ്ക്ക് പുറമെ ഒരു വെള്ളി കൊലുസും പ്രത്യേക സമ്മാനമായി നൽകി.
ഗ്രാമപഞ്ചായത്ത് സ്ഥിരം സമിതി അധ്യക്ഷൻ അശോകൻ മാസ്റ്റർ അധ്യക്ഷത വഹിച്ച ചടങ്ങ് തൂണേരി ബി.ആർ.സി. ബി.പി.സി. സജീവൻ മാസ്റ്റർ ഉദ്ഘാടനം ചെയ്തു. സ്കൂളിലെ പ്രധാന അധ്യാപിക ശ്രീമതി വി.കെ. അനില സ്വാഗതം ആശംസിച്ചു.
ആശംസകൾ അറിയിച്ചുകൊണ്ട് സ്റ്റാഫ് സെക്രട്ടറി പ്രദീപ്കുമാർ പള്ളിത്തറ, മദർ പി.ടി.എ. പ്രസിഡൻ്റ് ലിജിബ, സ്കൂൾ മാനേജർ പി.കെ. രാധാകൃഷ്ണൻ, സാൻഡ്രിയ എന്നിവർ സംസാരിച്ചു. സ്കൂളിലെ അധ്യാപികയായ ബിന്ദു എം. നന്ദി പ്രകാശിപ്പിച്ചു.
Siya Sunil and Sanrag make Valayam UP School proud: Stars receive a warm welcome
