വടകര: (vatakara.truevisionnews.com) നിയുക്ത മുഖ്യമന്ത്രി വി.ഡി. സതീശനെ അഭിനന്ദിച്ചുകൊണ്ട് വടകര എംപി ഷാഫി പറമ്പിൽ പങ്കുവെച്ച ഫേസ്ബുക്ക് പോസ്റ്റിന് താഴെ പ്രതിഷേധവുമായി ഒരു വിഭാഗം പ്രവർത്തകർ. പോസ്റ്റ് വന്ന് മണിക്കൂറുകൾക്കകം ആയിരക്കണക്കിന് കമന്റുകളാണ് ഷാഫിക്കെതിരെയുള്ള വിമർശനങ്ങളുമായി നിറഞ്ഞത്. മുഖ്യമന്ത്രി സ്ഥാനത്തെച്ചൊല്ലി നടന്ന തർക്കങ്ങളിൽ ഷാഫി പറമ്പിൽ ഗ്രൂപ്പ് കളിയിൽ പങ്കാളിയായി എന്നാരോപിച്ചാണ് മിക്ക പ്രതികരണങ്ങളും.
ജനങ്ങളാണ് ഹൈക്കമാൻഡെന്നും, ജനപിന്തുണയുള്ള നേതാക്കളെ അവഗണിക്കുന്നത് ശരിയല്ലെന്നുമാണ് കമന്റുകളിൽ ഭൂരിഭാഗവും സൂചിപ്പിക്കുന്നത്. ഗ്രൂപ്പിന് അതീതമായി പ്രവർത്തിക്കേണ്ട ഷാഫി പറമ്പിൽ ഒരു പ്രത്യേക പക്ഷം ചേർന്ന് കരുനീക്കങ്ങൾ നടത്തിയെന്ന് പ്രവർത്തകർ ആരോപിക്കുന്നു.
"നിങ്ങളെ വടകരയിൽ വിജയിപ്പിച്ചത് യുഡിഎഫ് പ്രവർത്തകരാണ്, അല്ലാതെ ഗ്രൂപ്പുകാരല്ല" എന്ന് ഒരു വിഭാഗം ഓർമ്മിപ്പിക്കുമ്പോൾ, സ്ഥാനമാനങ്ങൾക്ക് വേണ്ടിയുള്ള ഇത്തരം ഗ്രൂപ്പ് യുദ്ധങ്ങൾ കോൺഗ്രസിനെ തകർക്കുമെന്നും ചിലർ മുന്നറിയിപ്പ് നൽകുന്നു. പദവികൾ ഇന്ന് വരും നാളെ പോകും, എന്നാൽ ജനഹൃദയങ്ങളിലെ സ്ഥാനം നഷ്ടപ്പെട്ടാൽ തിരിച്ചുപിടിക്കാൻ പ്രയാസമായിരിക്കുമെന്നും കമന്റുകളിൽ വിമർശകർ കുറിച്ചു.
രമേശ് ചെന്നിത്തലയെ അനുകൂലിക്കുന്നവരും ഗ്രൂപ്പ് രാഷ്ട്രീയത്തിന് അതീതമായി നിലപാടെടുക്കണം എന്ന് ആഗ്രഹിക്കുന്നവരുമാണ് ഷാഫിയുടെ പോസ്റ്റിന് താഴെ കടുത്ത ഭാഷയിൽ പ്രതികരിക്കുന്നത്. അതേസമയം, സതീശന്റെ സ്ഥാനാരോഹണത്തെ സ്വാഗതം ചെയ്യുന്നവരും ഇക്കൂട്ടത്തിലുണ്ട്.
Cyber attack follows MP Shafi's Facebook post wishing Satheesan
